Semando vientos...

Pasiando hai poco,  atopé a un paisanu, un vecín del pueblu au trabayo la tierra, que convidóme a ver la so casa. Una casona d’estes antigües, de señoritu, con capiella y too. Na visita llevómos a les antigües cuadres y ellí vi daqué precioso na penumbra. Un carru’l país perfeutamente conserváu. Tuvimos falando un cachu del carru y cuntómos como yeren, que tipoloxíes había (esti, díxome, yera de Campu Casu)  y como elli de nenu conocío dalgún.

Tamién tuviemos falando del galipu qu’ellí tenía. El galipu, desplicómos Pepe Alberto, yera un midía antigua. Na so casa usábenla pa midir les fabes y les patates. Esti vecín alcordábase dafechu de lo que llevaba de fabes: 4 kg. Echabes les fabes nel galipu y con una regla rasábeslu. Eso yeren los cuatro kilos. De lo que llevaba patates ya nun s’alcordaba tantu.

Lo más guapo d’esto foi que demientres unos minutos dos xeneraciones estremaes compartimos espaciu, llugar y hestoria. Y esi espaciu y esa hestoria yeren reales. Nun yera un llibru sobre preseos antiguos d’Asturies, nin una sala mal allumada d’un muséu. Yera la casa de Pepe Alberto y yo colé pa la de mio con un bon recuerdo y sabiendo cuanto lleva un galipu fabes.