Semando vientos...

Ayeri paecía un día especial pa muncha xente. Yo intrigáu avereme güei hasta la güerta a ver si pasare daqué y nun vi nada fuera lo normal. Un par de tomatas que me mataron los bichos, unes cuantes fabes que nun se llograron y ñacieron descabezaes y dalgún caracol que taba poniéndose les botes coles berces.

Pero en realidá, nada de nada, nun teo consciencia de que camudara daqué.

La mio güerta ta au taba.

Anguaño, ¿somos conscientes de que tol discursu políticu se fai dende la urbe y pa la urbe?

A mi m'esmuel que lo rural solo apaeza na estaya d'ecoloxía o de sovenciones.

El mundu rural ye conservador. Se tien a conservar la vida, se ye conservador vitalmente y tamién, munches vegaes, políticamente. Pero dende la urbe ¿se conoz lo suficiente pa tenelo en cuenta na ellaboración d'un discursu emancipaor?

Los discursos lliberadores nun suelen calar nel paisanu/a de campu. ¿Daquién sabe por qué?. ¿Dalguién ye consciente d'ello?

La política de la urbe quiciabes nun val pal campu y hai que recamentar el discursu.

¿Ye la izquierda progresista, cegarata creyente nel tecnolóxicu progresu fracasáu, tan culpable de la situación d'amenorgamientu vital de la ruralidá como'l capitalismu xabaz desidioloxizáu?

L'otru día fui a la manifestación del Día Les Lletres y prestóme abondo. Prestóme ver tanta xente distinto pasiando pel centru Uviéu col mesmu interés: que la nuesa llingua seya oficial y que los que somos asturfalantes –y quien quiera selo- tengamos los mesmos drechos que los demás falantes, seyan de la llingua que seyan.
Pero nun toi ciertu de dalgunes coses. Por exemplu, si tolos que tábemos glayando pol asturianu tamos ehí polo mesmo; esto ye, si tolos que participemos na manifestación tenemos nidio que l'asturianu nun ye solo una llingua, sinón que ye una parte perimportante de la nuesa identidá como persones.
Ta perclaro que l'asturianu ye perbona ferramienta pa comunicar cualesquier cosa, poro, tamién tenemos de tener presente que ye una parte de la nuesa xenética, entendía esta como esperiencia vital, de la biografía de nueso, de la nuestra hestoria.
Munchos de los que güei mos esmolecemos por que la llingua asturiana siga viva somos herederos direutos del campu asturianu. De campesinos qu'antaño dexaron les sos tierres y colaron pa les ciudaes del centru d'Asturies a participar d'una nueva actividá económica, la industrialización. Mecanización de la vida qu'amenorgó la nuesa identidá, la casería, pa metemos de llenu nuna realidá nueva; común al restu'l mundu, au les vieyes costumes nun teníen llugar y onde los paisanos de siempres yeren babayos ensin cultura.
Anguaño reclamamos la oficialidá y damos muncha importancia a que la sociedá asturiana s'implique nesti procesu llexítimu. Tanto mos esmolecemos nello que cuanta más xente tea pola oficialidá meyor. Ye bien cierto qu'esto ye asina, pero nesti procesu de prestixar la nuesa llingua tamos dando-y demasiada importancia a les "figures del asturianu", a los "star system" de la llingua. Claro que ye bono qu'heba xente importante que tea pola llingua, pero esto m'esmolez porque teo mieu que tres esti interés culturizador s'escuendan prexuicios.
Nun ye más importante que fale un profesor d'universidá n'asturianu, por muncho que-yos manque a dalgunos, qu'un paisanu de pueblu. Tan importante ye la xente que llinda les vaques n'Asturianu, que l'eruditu que da la clas na nuesa llingua. Ganao ye too.
Mira-y lo que vos digo: pa prestixar una llingua nun hai qu'escaecer a una parte los sos falantes nin una parte de la nuesa cultura.
Ún de los postreros llibros que merqué, fago un incisu, fue'l cartafueyu normativu sobre interné. L'asturianu tien de tar en toles estayes de la vida y la rede nun tien de ser menos, pero nun mos confundamos: esto nun quita pa que l'asturianu del campu tenga la mesma importancia que la llingua de les nueves teunoloxíes. L'asturianu nun val solo pa la vida campesina, pero val pa ella y lleva valiendo amunchayá.
Nel casu l'asturianu bien de coses-yos debemos a les persones que nos pueblos siguieron falando como güei queremos falar. Ye guapo que s'escriban llibros n'asturianu, que se fagan programes n'asturianu, qu'heba estrelles del asturianu... Pero más importante ye, polo menos asina lo diz la hestoria, que se fale a les vaques na nuesa llingua. Esto postrero ye sincero. 

La unidá básica d'esplotación agraria n'Asturies ye la casería o caseirío, términu xeneralizáu pa tol país y que noma la casa, los edificios apegaos a ella -cuadra, horros y paneres, tendeyones, llagares-, les tierres -tierres individuales y tierres dientro de les eríes con derechos d'aprovechamientu coleutivu-, los espacios de pastu -praos individuales y los terrenos dientro de les morteres con derechos de aprovechamientu coleutivu- y los derechos d'usu comunal de los pastos coleutivus y los montes.

Margarita Fernández Mier: "Entamu: l'espaciu agrariu n'Asturies". Cultures Nb. 11. Uviéu (2002)

... el caseirío. Ta integrao polla casa como centro da esplotación y xunto a ella tán as cuadras y os cabanóis, a corrada, el horto y el horta. Separadas del que sería a quintana d'outros llaos d'Asturies, tán as terras d'uso familiar y, noutros tempos, outras terras de cultivo comúis peró d'uso familiar, al menos úa parte del ano (as suertes das senras).

Benxamín Méndez García: "El espacio agrario na marina del conceyo de Cuaña). Cultures Nb. 11. Uviéu (2002)

Na semeya podemos ver una casería de tipoloxía mariñana (Villaverde, Conceyu Villaviciosa) cola casa, l'horru y la güerta.

Les vaques tienen un 80% d'información celular que ye común colos humanos.

Ayeri lleí esto con mieu nun mediu de comunicación de mases. Siguí lleendo y quede ablucáu. Equí pongo un cachín del artículu.

¿Qué significa esto? Pos que la vaca ye'l primer animal d'interés ganaderu que se secuencia, que se secuencia'l so xenoma completu. Esti llabor foi fechu por 300 científicos de 25 países y el resultáu "proporciona una fonte de conocimientu de la evolución de los mamíferos y d'aceleración del ameyoramientu xenéticu del ganao pa la produición de lleche y carne". Investigación espublizada na revista Science.

El prósimu oxetivu va ser esplorar la secuencia del xenoma bovín pa entender les bases xenétiques del ésitu evolutivu d'esti tipu animal y tener la oportunidá de despachar dellos temes cruciales, como la produición alimenticia eficiente y caltenible. Esto va acelerar el desendolcu de nueves tecnoloxíes pa una agroganadería caltenible, sorrayen los científicos.

Shirley Ellis -del Conseyu d'Investigación en Ciencies Biotecnolóxiques y Biolóxiques del Reinu Xuníu- dixo qu'asina van poder "caltenese poblaciones de vaques saludables que seyan capaces d'apechugar col cambéu climáticu y les enfermedades emerxentes".

Vamos que d'equí a unos años nun va haber vaques de verdá. Van ser productos de llaboratoriu. Animales mecanizaos, coses preparaes pa producir industrialmente. Lleche aguao pa sirvir a la masa. Masa que yá nun ye quien a beber lleche de verdá porque-y sienta mal y tiene/tenemos que bebela tratada nuna llechería.

Vaques qu'en vez de cagar mierda van echar flores, nun vaiga ser que'l turista pase a la vera una cuadra y güela a cuchu.

Bonos científicos tenemos, que modifiquen animales pa soportar el cambéu climáticu en cuentes de lluchar escontra elli. Dempués enllenaráse-yos la bocona cola oxetividá de la ciencia, col métodu científicu.

¡Adios Cordera! ¡Adios!

Cómo ye posible que vivamos nuna sociedá onde faen falta más diseñadores gráficos qu’agricultores.

Cómo ye posible qu’heba más xente que sepa manexar el Photoshop qu’una fesoria.

Cómo ye posible qu’un rapaz que fae publicidá, pal sistema capitalista xabaz nel que vivimos, tenga más consideración social qu’otra moza que coles sos manos llimpies cultiva la tierra y pue auto-satisfacer la so fame.

Agora ye Motiva ’09. L’alcuentru de diseñu más famosu d’Asturies y au tou bon modernu dirá pa tar al tantu de les postreres modes na industria de la publicidá. Llámenlo creatividá. Yo llámolo collaboracionismu. Rapacinos ilusionaos ya ilusos, de les escueles d’artes, dirán como ganao a la Llaboral pa ser bien adoctrinaos. Pa que nel so futuru profesional seyan quien a facer un bon trabayu de marketing pal sistema y ensín rechistar. A cambio de la so inestimable collaboración, como bonos sicarios, podrán vistir con ropes llamatives, a la última, como manda la MTV.
Bono… Ta bien. Yo toi equí recabando la tierra y esta nueche se que voi cenar; Tú, ¿sábeslo?

Una de les coses que más m’esmuelen ye’l constante procesu de zarramientu del mundu rural; esto ye, ver como día a día munchos pueblos d’Asturies van tresformándose en zones residenciales au lo único que pue vese ye muries peraltes qu’aislen l’interior de la ñatura esterior.
El mundu rural asturianu nun sólo ta siendo abandonáu, colo qu’esto significa, sinón que ta siendo pobláu por xente que l’usa como segunda residencia, zarrando l’espaciu, la vida campesina. Esto ye daqué alarmante yá que nun se revitaliza’l campu, sinón que s’asesina, produzse un deterioru mayor.
Un campu rural abiertu, onde la casería tradicional nun tenía muries peraltes p’aislar la vida de la ñatura, ta vivu. D’esti xeitu, la xente desendolca la so vida n’equilibriu col mediu. Collabora col espaciu pa medrar, físicamente y como persona. Nes zones onde tovía hai vida rural activa los campos nun tan recubiertos de maleza y la xente llanta pa comer. La quintana tien sanos los sos güertos, güertes y lloses. La xente campesino s’alimente colo que produz, des-capitaliza la esistencia y afonda, consciente o incoscientemente, n’auto-xestión. Caltién formes tradicionales de produición, más o menos tecnificaes pero ensin llegar al grau de tecnoloxificación xabaz del industrialismu modernu. Les carreteres, caleyes y caminos del pueblo tan llimpios. N’andecha o sestaferia s’igüen les coses, se collabora comuñalmente nel bien del tou.
Per otru llau, un mundu rural de segunda residencia amenorga la produición de sosistencia. La xente se tresllada pa facer el llabor asalariáu a les ciudaes y solo a lo postrero del día aportia al campu pa “esfrutar” del la vida ñatural. Les cases, alloñaes enforma de la tradicional quintana, adopten formes de xalé adosáu o de construición típica del monte madrilanu. Los pueblos son anguaño una amestadura de cases tradicionales y xales, nun caos “urbanísticu” estéticamente molestu y culturalmente funestu. Un intentu ruin d’estremar a los nuevos “pueblerinos” del campesín. Xalé escontra quintana vieya. Lo nuevo y moderno énte lo antiguo y “atrasao”. Esta ruralidá zarrada, de cases aislaes, solo necesita una vía de serviciu. Una carretera curiosa pa enllazar cola autovía más cercana. Caminos y caleyes se desdexen. Y la maleza cubre tola redolada.
Asturies con esi proyeutu – realidá denomáu “Ciudá Astur” quier concentramos a toos nel centru’l país, dexando los llaterales, lo menos poblao y más ñatural, pa segundes residencies. Una ruralidá al mou de Somió o Ciudá Naranco. Construiciones zarraes, millonaries pa millonarios. Algamaremos un mundu rural percostoso y onde solo podrán vivir los ricos, colos sos cochones y los sos xales de tipoloxía madrilana (nun confundir con mariñana). Un ñaturalidá solo permitía a dalgunos bolsos y demientres el restu la población mos apiñaremos nun centru super-urbanu, hiper-contamináu y totalmente des-humanizáu.
Dependeremos de grandes multinacionales p’alimentamos, escaeceremos el tratu cola tierra y perderemos la sabiduría de sieglos d’asturianos que vivieron, con tolo qu’esto significa, col campu.
Anguaño yá pasa. Esto nun ye una distopía, un paséu per munchos conceyos asturianos muéstramos qu’esto yá ta pasando y que dirá a peor, asina mos lo tienen planificao dende l’alministración. Y si naguamos por tornar a la vida campesina, por desfacemos de llastres capitalistes, por abandonar la non-vida asalariada… o tenemos perres enforma pa mercar una estaya tierra o ponemos de fondu pantalla l’ordenador una semeya guapa que ye lo más cerca que taremos d’algamalo.