Semando vientos...

Equí dexo una semeya d'una güerta en Tuña (Cuartu La Riera - Conceyu Tinéu). Esti perguapu pueblu tien bien de güertes y lo que más me llamó l'atención foi que la berza ye'l productu estrella y lo que más se sema. Por desgracia, les patates taben atacaes de Mildiu.

A la solombra del Monsacro, nel Conceyu Morcín, asítiense dos pueblos perguapos de l'Asturies rural: Les Vegues de Cardeo y El Vallín.

Nesti espaciu rural a la veriquina d'Uviéu y Mieres - tan a escasos 14 kms de dambes ciudaes- hai bien de güertes que la xente de la fastera cuida con procuru.

Equí dexo unes semeyes.

Horru con una estayina güerta a la so vera, ente'l Monsacro y L'Aramu en Les Vegues de Cardeo (Morcín)

Una vista dende El Vallín (Morcín) al "monte sagráu"

Güerta de Maruxa, vecina de Cardeo, n'El Vallín. Esti puebliquín tien unes vistes espeutaculares y dende él puen vese los valles de Morcín, na Comarca de La Montaña Central.

Pa que dalgún arrane equí teneis una semeya de les freses de Conchita, una vecina de güerta y una muyer que m'aprende milenta coses d'esti mundu campesín asturianu.

Yá tan los pumares en flor y, si aguanten, esti añu va haber mazana enforma pa mayar. Tamos n'añu impar, esto ye, añu de collecha y pa tolos que somos unos enamoraos de la sidra esto significa que vamos poder beber sidra asgaya.
Presta abondo dir pelos pueblos d'Asturies y ver los pumares en flor. Árbol que dará la materia prima necesaria pa la bébora asturiana y campesina por escelencia. Cuasique la puedo goler.

Equí dexo una semeya d'una flor de pumar, d'un pueblu de maliayo.

Esta semeya ye d'una muyer de la mariña maliaya, Villaverde (Villaviciosa), llantando cebollu nel so güertu.

Cuando toi de viaxe per Asturies préstame asgaya ver les güertes de la xente. Entretienme abondo mirar les coses que tien llantaes la xente y cuido que yera cosa guapa dir metiendo semeyes d'esi llabor campesín qu'hai per Asturies.

Entamo con un naranxu qu'atope pasiando per San Roman de Candamu, una tarde buxa que m'empobine pa conocer esi pequeñu conceyu asturianu.