Semando vientos...

Les vaques tienen un 80% d'información celular que ye común colos humanos.

Ayeri lleí esto con mieu nun mediu de comunicación de mases. Siguí lleendo y quede ablucáu. Equí pongo un cachín del artículu.

¿Qué significa esto? Pos que la vaca ye'l primer animal d'interés ganaderu que se secuencia, que se secuencia'l so xenoma completu. Esti llabor foi fechu por 300 científicos de 25 países y el resultáu "proporciona una fonte de conocimientu de la evolución de los mamíferos y d'aceleración del ameyoramientu xenéticu del ganao pa la produición de lleche y carne". Investigación espublizada na revista Science.

El prósimu oxetivu va ser esplorar la secuencia del xenoma bovín pa entender les bases xenétiques del ésitu evolutivu d'esti tipu animal y tener la oportunidá de despachar dellos temes cruciales, como la produición alimenticia eficiente y caltenible. Esto va acelerar el desendolcu de nueves tecnoloxíes pa una agroganadería caltenible, sorrayen los científicos.

Shirley Ellis -del Conseyu d'Investigación en Ciencies Biotecnolóxiques y Biolóxiques del Reinu Xuníu- dixo qu'asina van poder "caltenese poblaciones de vaques saludables que seyan capaces d'apechugar col cambéu climáticu y les enfermedades emerxentes".

Vamos que d'equí a unos años nun va haber vaques de verdá. Van ser productos de llaboratoriu. Animales mecanizaos, coses preparaes pa producir industrialmente. Lleche aguao pa sirvir a la masa. Masa que yá nun ye quien a beber lleche de verdá porque-y sienta mal y tiene/tenemos que bebela tratada nuna llechería.

Vaques qu'en vez de cagar mierda van echar flores, nun vaiga ser que'l turista pase a la vera una cuadra y güela a cuchu.

Bonos científicos tenemos, que modifiquen animales pa soportar el cambéu climáticu en cuentes de lluchar escontra elli. Dempués enllenaráse-yos la bocona cola oxetividá de la ciencia, col métodu científicu.

¡Adios Cordera! ¡Adios!

Sean Penn ye un rapaz que me cai simpáticu. Nun m’entruguéis el por qué, porque nun lo se. A pesar de tar metíu nesa fedionda industria cultural globalizaora, que ye’l cine americanu, tien daqué que respeto. Quiciabes seya esi curtiu que fizo naquella película sobro l’11S, que nin m’alcuerdo de cómo se nomaba, onde al cayer les torres xemeles la lluz entraba na casa d’un paisanín y revivíen les sos flores que taben morriendo pola solombra escura d’esos símbolos del capital.

La cuestión ye que Sean Penn adauto’l llibru, del periodista y alpinista americanu Jon Krakauer ,“Into the Wild” al cine y fizo un película espléndida. Esta ya la mio opinión. Crítiques hai munches y hai xente que cuida que ye un “peliculón” y xente que diz que ye una mierda, rebeldía adolescente en 7 mm., etc. Yo recomiéndola.

La hestoria trata sobro’l viaxe qu’un mozu, Christopher McCandless, entama dempués de graduase y desfacese de toles sos posesiones materiales haza la naturaleza xabaz americana, fasta Alaska. Nel camín atopa xente curioso, camienta sobro la vida civilizada, sobro conceutos como “llibertá”, “ñaturaleza”, etc. Too ello amestao con imáxenes de la vida alloriada de la ciudá onde la so hermana queda como interllocutora ente elli y la civilización. La fotografía ye espeutacular y quédate dempués de vela un bon saborgor de boca, un deséu escondíu d’escapar haza la esistencia mesma, haza la nuesa condición d’animalidá perdía. 

Títulu orixinal: Into the Wild
Añu: 2007
Duración: 140 min.
País: Estaos Xuníos
Direutor: Sean Penn
Música:  Michael Brook, Eddie Vedder, Kaki King (Cantares: Eddie Vedder)
Fotografía: Eric Gautier
Repartu: Emile Hirsch, Marcia Gay Harden, William Hurt, Jena Malone, Brian Dierker, Vince Vaughn, Kristen Stewart, Catherine Keener, Hal Holbrook, Thure Lindhardt, Signe Egholm Olsen, Zach Galifianakis, Haley Ramm 

Cómo ye posible que vivamos nuna sociedá onde faen falta más diseñadores gráficos qu’agricultores.

Cómo ye posible qu’heba más xente que sepa manexar el Photoshop qu’una fesoria.

Cómo ye posible qu’un rapaz que fae publicidá, pal sistema capitalista xabaz nel que vivimos, tenga más consideración social qu’otra moza que coles sos manos llimpies cultiva la tierra y pue auto-satisfacer la so fame.

Agora ye Motiva ’09. L’alcuentru de diseñu más famosu d’Asturies y au tou bon modernu dirá pa tar al tantu de les postreres modes na industria de la publicidá. Llámenlo creatividá. Yo llámolo collaboracionismu. Rapacinos ilusionaos ya ilusos, de les escueles d’artes, dirán como ganao a la Llaboral pa ser bien adoctrinaos. Pa que nel so futuru profesional seyan quien a facer un bon trabayu de marketing pal sistema y ensín rechistar. A cambio de la so inestimable collaboración, como bonos sicarios, podrán vistir con ropes llamatives, a la última, como manda la MTV.
Bono… Ta bien. Yo toi equí recabando la tierra y esta nueche se que voi cenar; Tú, ¿sábeslo?

El cebollu o cebollín, ye la cebolla pequeña enantes de ser tresplantada. Hai delles tribes de cebollu, pero vamos centramos nel cebollín colloráu.

Tando pa Grau, merqué un cientu cebollu colloráu pa llantar na mio Güerta (gustame muncho esta triba cebolla polo dulcino que ye y lo bien que ta n’ensalaes). Un bon manoyu, nun solo por ser de lo colloráu (qu’esti añu costóme atopar), sinón tamién pela calidá. Poro, ¿cómo reconocer un bon cebollu?
Pa saber si un cebollín ye bono o non lo primero qu’hai que mirar ye’l raigañu o guañu. Un bon cebollu tien unes raíces llargues. Amás del guañu, tien de mirase la cabeza’l cebollu, si cuasique nun tien cabeza ye meyor que si yá t’abultao (la cabeza’l cebollu ye lo qu’hai darréu’l raigañu) y p’acabar, hai que mirar que tenga bien de garganta, que ye lo qu’hai ente la cabeza y la parte verde. Nes semeyes pue vese cebollu con bones raíces y dello con cabeza y ensin cabeza.

Una vegada tenemos el cebollín ye hora llantalu. Pa facelo ye meyor que la tierra tea un poco húmedo, yá qu’asina va prender meyor la planta. Facemos un riegu, non mui fonderu, y vamos colocando’l cebollu nel mesmu, arrecostáu escontra una de les paredes del riegu. Dempués cola fesoria facemos otru riegu paralelu y echamos la tierra nel anterior pa dir tapando’l cebollín.

Conseyos:Nun facer un riegu mui fonderu y dexar un palmu ente cebollu y cebollu y ente riegu y riegu.

Esta semeya ye d'una muyer de la mariña maliaya, Villaverde (Villaviciosa), llantando cebollu nel so güertu.

Cuando toi de viaxe per Asturies préstame asgaya ver les güertes de la xente. Entretienme abondo mirar les coses que tien llantaes la xente y cuido que yera cosa guapa dir metiendo semeyes d'esi llabor campesín qu'hai per Asturies.

Entamo con un naranxu qu'atope pasiando per San Roman de Candamu, una tarde buxa que m'empobine pa conocer esi pequeñu conceyu asturianu.

El Nocéu ye una finca agro-ecolóxica asitiada en Sariegu y xestionada por Laurentina San José Vega y Aquilino González. En El Nocéu faen sidra ecolóxico con mazanes ecolóxiques, pero tienen más cultivos d'esti tipu. David Fonseca Cano de la revista "La Sidra" fízo-yos una entrevista nel mes d'ochobre de 2007, a cuentes un especial sobro sidra ecolóxico que fizo esti mediu comunicación. Reproducimos equí la entrevista yá que cuido que ye interesante lo que dicen Laurentina y Aquilino.

Lleer el restu d'esta entrada

Una de les coses que más m’esmuelen ye’l constante procesu de zarramientu del mundu rural; esto ye, ver como día a día munchos pueblos d’Asturies van tresformándose en zones residenciales au lo único que pue vese ye muries peraltes qu’aislen l’interior de la ñatura esterior.
El mundu rural asturianu nun sólo ta siendo abandonáu, colo qu’esto significa, sinón que ta siendo pobláu por xente que l’usa como segunda residencia, zarrando l’espaciu, la vida campesina. Esto ye daqué alarmante yá que nun se revitaliza’l campu, sinón que s’asesina, produzse un deterioru mayor.
Un campu rural abiertu, onde la casería tradicional nun tenía muries peraltes p’aislar la vida de la ñatura, ta vivu. D’esti xeitu, la xente desendolca la so vida n’equilibriu col mediu. Collabora col espaciu pa medrar, físicamente y como persona. Nes zones onde tovía hai vida rural activa los campos nun tan recubiertos de maleza y la xente llanta pa comer. La quintana tien sanos los sos güertos, güertes y lloses. La xente campesino s’alimente colo que produz, des-capitaliza la esistencia y afonda, consciente o incoscientemente, n’auto-xestión. Caltién formes tradicionales de produición, más o menos tecnificaes pero ensin llegar al grau de tecnoloxificación xabaz del industrialismu modernu. Les carreteres, caleyes y caminos del pueblo tan llimpios. N’andecha o sestaferia s’igüen les coses, se collabora comuñalmente nel bien del tou.
Per otru llau, un mundu rural de segunda residencia amenorga la produición de sosistencia. La xente se tresllada pa facer el llabor asalariáu a les ciudaes y solo a lo postrero del día aportia al campu pa “esfrutar” del la vida ñatural. Les cases, alloñaes enforma de la tradicional quintana, adopten formes de xalé adosáu o de construición típica del monte madrilanu. Los pueblos son anguaño una amestadura de cases tradicionales y xales, nun caos “urbanísticu” estéticamente molestu y culturalmente funestu. Un intentu ruin d’estremar a los nuevos “pueblerinos” del campesín. Xalé escontra quintana vieya. Lo nuevo y moderno énte lo antiguo y “atrasao”. Esta ruralidá zarrada, de cases aislaes, solo necesita una vía de serviciu. Una carretera curiosa pa enllazar cola autovía más cercana. Caminos y caleyes se desdexen. Y la maleza cubre tola redolada.
Asturies con esi proyeutu – realidá denomáu “Ciudá Astur” quier concentramos a toos nel centru’l país, dexando los llaterales, lo menos poblao y más ñatural, pa segundes residencies. Una ruralidá al mou de Somió o Ciudá Naranco. Construiciones zarraes, millonaries pa millonarios. Algamaremos un mundu rural percostoso y onde solo podrán vivir los ricos, colos sos cochones y los sos xales de tipoloxía madrilana (nun confundir con mariñana). Un ñaturalidá solo permitía a dalgunos bolsos y demientres el restu la población mos apiñaremos nun centru super-urbanu, hiper-contamináu y totalmente des-humanizáu.
Dependeremos de grandes multinacionales p’alimentamos, escaeceremos el tratu cola tierra y perderemos la sabiduría de sieglos d’asturianos que vivieron, con tolo qu’esto significa, col campu.
Anguaño yá pasa. Esto nun ye una distopía, un paséu per munchos conceyos asturianos muéstramos qu’esto yá ta pasando y que dirá a peor, asina mos lo tienen planificao dende l’alministración. Y si naguamos por tornar a la vida campesina, por desfacemos de llastres capitalistes, por abandonar la non-vida asalariada… o tenemos perres enforma pa mercar una estaya tierra o ponemos de fondu pantalla l’ordenador una semeya guapa que ye lo más cerca que taremos d’algamalo.

Esti vienres cellébrase'l Día Mundial de les Lluches Campesines y podemos facer delles coses:

El xueves 16 a les 19.30h aldarique: cooperatives agroecolóxiques, una propuesta de soberanía alimentaria. Con Pilar Galindo [Cooperativa la Garbancita Ecológica, Madril]. Salón de plenos de la Casa Conceyu de Navia.

El vienres 17 a les 20h. Concentración: Soberanía alimentaria yá. Llugar: Teatru Campoamor (Uviéu). Entama: Campaña Asturiana Agrocombustibles Non.

Más info en: http://www.localcambalache.org/

Entamamos cola sema la llechuga. Una hortalexa de fueya, perconocía por toos, y que podemos llantala durante tol añu. Anque hai delles variedaes, vamos referimos a la típica, la que solemos comer toos n’ensalada.
La xente que sabe bien d’esto de l’agricultura diz que nun paga la pena sacar la simiente la llechuga y suel mercase llista pa llantar. De toos modos, al final pondré cómo saca-y la grana a una planta llechuga pa tener pal añu que vien.
Enantes d’empecipiar un conseyu: nun mercar munches llechugues d’una vegada. Lo “normal” ye dir semándoles escalonadamente, pa que nun se mos dea toa a la mesma vegada. Pa otru tipu productos nun importa tanto, pero la llechuga nun se conserva bien y piérdese perrápido, asina que val más entamar a llantar media docena o una docena y a los quince díes más. Asina diremos semando y recoyendo pocu a pocu y nun se mos perderá nenguna.
Bono, pos les llechugues véndense cuando tienen cuatro o cinco fueyes. Vien cada planta con un terronín de tierra, un tallu y les fueyines. Pa llantales fadremos una estaya nel güertu (hai que ser curiosos, non solo pa que’l güertu seya guapu, sinón porque cuanta más llimpieza y orde heba meyor se mos darán les coses y menos problemes de plagues vamos tener) y diremos plantando les llechugues a poca distancia unes d’otres. Un palmu ente llechuga y llechuga ye de sobra. Facemos un furacu na tierra, enterramos la llechuga y tapámosla bien, apertando pa que quede bien fixa nel terrén.
Enterramos la parte la planta que tien tierra y dexamos el tallu y les fueyes fora. El furacu sedrá más o menos d’unos 5 centímetros, pero esti tipu datos nun me presten un res, porque naide va dir con un centímetru midiendo. Con llantar la parte con tierra, si acasu un pocu más, sedrá de sobra.
Una vegada llantaes s’espera a l’atardecer y se rieguen, con bien d’agua. Nunca regar cuando hai muncho sol, porque podría quemase la llechuga. Meyor esperar a que yá nun heba sol y regar.
Hai que regales muncho recién llantaes, dempués yá nun ye tan necesario (mirar la tierra y si paez mui seca dai-yos una moyaura, siempres pela tarde).
Agora solo hai qu’esperar a que medren (suelen tardar un par de meses en medrar y tar llistes pa collechar, anque eso vese bien) y en pocu tiempu tendremos unes llechugues perguapes pa comer.

Problemes:
El principal problema la llechuga son los bichos. El caracol y los llimiagos tienen especial enclín pa esti tipu planta y van direutos a come-y les fueyes. Hai varies maneres de lluchar (si se quier, siempres podemos dexar les llechugues a la so suerte y ver que pasa) escontra estos “problemes”.
El más normal ye usar un tipu venenu químicu (babosil, suel nomase), que vien en forma bolines azules que s’esparde alrodiu la estaya y evita qu’entren caracoles y llimiagos a comer les llechugues. Resultáu: mata los bichos y vais ver alrodiu la estayina una montonera caracoles muertos que plasma. L’arrepentimientu suel ser la reaición .
Otru remediu non químicu ye l’usu de ceniza, qu’espanta los bichos yá que-yos ye mui molesto. Asina podemos rodiar la estaya de ceniza o virutes de madera, que tamién val, y caltendrá a caracoles y llimiagos apartaos. Poro, esti remediu nun ye efectivu 100% y si llueve y se mueya la ceniza o la viruta tendremos de camudalo. Requier más esfuerciu que’l babosil, pero siénteste meyor.
Hai más métodos, pero la ceniza o la viruta madera podríen ser suficientes. De toos modos, hai xente que come caracoles, yo nin llocu, y pueden poner una teya al llau la estaya con un platín con cerveza debaxo au dirán los caracoles y pañalos, pela mañana, pa comelos. Yo, como yá dixe, nun toi dispuestu a comer un caracol nin fartucu sidra.

Otres coses:
Sallar. Pa que les llechugues medren bien hai que sallar, llimpiar la tierra de yerbes y males plantes, dacuando. Pola mio esperiencia, que nun ye muncha, sallar ye necesario cuando entamamos a llantar daqué. Una vegada crecía la planta, cuando tien más fuercia, nun fai falta ser tan llimpiu, sallar muncho. Convién selo pa evitar plagues, poro, la planta (nesti casu la llechuga) yá tien fuercia y pue más que les males yerbes.
Colos caracoles y llimiagos teo la mesma teoría. Nun ye lo mesmo que mos ataquen la llechuga cuando tien cuatro o cinco fueyes, que puen matámosla, que cuando yá ta grande. Yo cuando la llechuga ta grande nun uso nengún tipu muria de ceniza o viruta. Si acasu echo-yos un güeyada a les llechugues y si veo un caracol quítolo coles manes. Ellos tamién tienen drechu, ¿non?

Collechar:
Bien facilino. Con un cuchiellu se corta la bas la llechuga (u hai un troncu gordo) y llisto.

Semilles:
Anque como dicía al entamu nun paga la pena, dicen, caltener la grana d’un añu pa otru. Voi poner como facelo. Yo siempres digo qu’hai que sabelo too, anque dempués nun lo fagamos.
Pa sacar la simiente la llechuga déxase una planta espoxigar. Esta medra enforma y salen-y flores, ¡curiosa la planta la llechuga! Dexámosla que seque, arrancámosla y ximelgámosla enriba dalgo. Van cayer milenta simientes, porque son bien pequeñes, y estes una vegada seques podemos usales pal añu que vien.
La planta puen atacala los páxaros. Lo que suel recomendase ye cubrila con una bolsa o tela, que podemos usar dempués, cuando la ximielguémos, pa recoyer esa grana.

Propiedaes de la llechuga:
Tien poques caloríes y aurea l’estantín. Tien, amás, vitamines A, B, C, D y E, calciu, cinc, fierro, fósforu, potasiu y sodiu, anque en pequeñes cantidaes.

Cuido que lo meyor, enantes d'escribir nada, ye facer una pequeña presentación de la intención d'esti blog y d'ún mesmu.

Semando vientos... ta fechu por un campesín aficionáu; esto ye, por un rapaz que tien un güertu al que-y dedica'l so tiempu llibre y qu'anguaño, y gracies al mesmu, ye autosuficiente, no qu'alimentación vexetal se refier, y reduxo la so xornada llaboral a la metá.

Cuando empecipie a llantar nun tenía nin idea, pero gracies al sofitu la xente del pueblu mariñanu au teo'l güertín fui deprendiendo como llantar les llechugues, les patates, como lluchar escontra plagues, como sallar, cuales yeren les tribes de tomatas o como recuoyer los fréxoles. Deprendí abondo coses de los mios vecinos y paeciome bona idea compartir cola xente esta sabiduría.
Asina, dire xubiendo semeyes de como llantar les coses, conseyos pa lluchar escontra plagues, tribes de plantes, dómines pa semar y pa collechar... Espero que seya un blog útil pa la xente.

Per otru lláu, dire poniendo cosuques que m'esmuelen (el constante procesu de tecnoloxicación de la sociedá, la contaminación, l'abandonu del mediu rural, etc.) o m'interesen (el discursu de crítica a la civilización, iniciatives verdes d'otres fasteres, l'autoxestión, la crítica al trabayu asalariadu...), nun procesu de crecimientu nel que tamién quiero dir ameyorando'l blog, tanto estéticamente como en conteníos.

Semando vientos... apuesta pola agricultura ecolóxica, pero ensín usar esti axetivu, yá que nun debería ser necesariu. N'Asturies hai bien d'alternatives a los productos químicos y el resultáu ye perbono. De la güerta al platu direutamente ye l'oxetivu, ensín esmolecese pola química que mos envenena.

Otru oxetivu ye depender cada vegada menos del sistema capitalista y afondar n'autoxestión de les nueses vides y pa ello l'alimentación ye parte perimprescindible d'esti procesu d'emancipación personal.

Pos nada más... Entamamos